चंद्रपूर : ताडोबा- अंधारी व्याघ्र प्रकल्पात सोडलेल्या तीन गिधाडांचा मृत्यू झाल्याची बाब समोर आली आहे. बोटेझरी जंगलात ही गिधाडे सोडली होती. याच वर्षीच्या जानेवारीत हरियाणातील पिंजोर येथून आणलेल्या संकटग्रस्त व नामषेश होण्याच्या मार्गावर असलेल्या १० गिधाडांना जीएसम ट्रान्समिशन ट्रॅकिंग डिव्हाईस लावून बोटेझरी येथे सोडले होते. ही घटना गुरुवारी उजेडात आली आहे. वनविभागाने मृत गिधाडांचे अवशेष अधिक तपासणीसाठी पाठविले आहे. (Tadoba)
मुंबई : विशेष प्रतिनिधी : मुंबईवरील २६ /११ च्या दहशतवादी हल्ल्यात हौतात्म्य आलेल्या पोलिसांना राज्यपाल सी. पी. राधाकृष्णन यांच्यासह मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांनी अभिवादन केले. मुंबई पोलीस मुख्यालयातील पोलीस स्मारक येथे पोलीस अधिकारी व जवानांना पुष्पचक्र वाहिले.
राज्यपालांनी हुतात्मा पोलीस कुटुंबातील सदस्यांची तसेच उपस्थित आजी व माजी वरिष्ठ पोलीस अधिकाऱ्यांची भेट घेतली. यावेळी दीपक केसरकर, मंगल प्रभात लोढा, मुख्य सचिव सुजाता सौनिक, रश्मी शुक्ला, वरिष्ठ अधिकारी डॉ. इकबाल सिंह चहल, मुंबईचे पोलीस आयुक्त विवेक फणसाळकर यांनीही अभिवादन केले.
महाराष्ट्र दिनमान ऑनलाईन डेस्क : महाराष्ट्र राज्य विधानसभेची आज (दि.२६) मुदत संपत आहे. यामुळे महाराष्ट्र राज्याचे मुख्यमंत्री एकनाथ शिंदे यांनी आपल्या पदाचा राजीनामा राज्यपाल सी. पी. राधाकृष्णन यांना सादर केला. यावेळी नव्या सरकारचा शपथविधी होईपर्यंत राज्यपाल सी. पी. राधाकृष्णन यांनी एकनाथ शिंदे यांना काळजीवाहू मुख्यमंत्री म्हणून राज्य कारभार पाहण्यास सांगितले. (Eknath Shinde)
आज (दि.२६) सकाळी मुख्यमंत्री एकनाथ शिंदे यांनी राजभवन येथे राज्यपाल सी. पी. राधाकृष्णन भेट घेऊन मुख्यमंत्रीपदाचा राजीनामा दिला. यानंतर राज्यपालांनी एकनाथ शिंदेंचा राजीनामा स्वीकारून नवीन मुख्यमंत्र्यांची नियुक्ती होईपर्यंत शिंदे यांची काळजीवाहू मुख्यमंत्री म्हणून नियुक्ती करत असल्याचे पत्र त्यांना सुपूर्द केले. यावेळी उपमुख्यमंत्री देवेंद्र फडणवीस, उपमुख्यमंत्री अजित पवार, मंत्री दीपक केसरकर, दादाजी भुसे आणि चंद्रकांत रघुवंशी उपस्थित होते.
चौदाव्या विधानसभेचा कालावधी संपुष्टात आल्याने मुख्यमंत्री एकनाथ शिंदे यांनी मंगळवारी राजभवनात राज्यपाल सी.पी. राधाकृष्णन यांची भेट घेऊन आपल्या पदाचा व मंत्रीमंडळाचा राजीनामा दिला. यानंतर राज्यपालांनी मुख्यमंत्र्यांना पर्यायी व्यवस्था होईपर्यंत कार्यभार सांभाळण्यास सांगितले.
चौदाव्या विधानसभेचा कालावधी आज संपुष्टात आला. त्यामुळे हे सभागृह बरखास्त झाले आहे. निवडून आलेल्या सदस्यांकरवी नवीन सभागृह अस्तित्वात येईल. नव्या सरकारचा शपथविधी होईपर्यंत शिंदे काळजीवाहू मुख्यमंत्री म्हणून काम पाहतील. (Eknath Shinde)
हेही वाचा :
मुंबईः महाराष्ट्रात भाजपला आजपर्यंतचा सर्वात मोठा विजय मिळवून देणारे देवेंद्र फडणवीस तिसऱ्यांदा मुख्यमंत्री होणार आहेत. राष्ट्रीय स्वयंसेवक संघाच्या आणि भाजपच्या दबावामुळे आता फडणवीस यांच्या निवडीची औपचारिकता उरली आहे. अजित पवार यांनी रविवारीच फडणवीस यांच्या मुख्यमंत्री होण्याला अनुकूलता दाखवली होती. एकनाथ शिंदे यांच्या काही समर्थकांनी बिहार व अन्य राज्यांची उदाहरणे देत नाव रेटण्याचा प्रयत्न केला; परंतु त्यावर उतारा म्हणून आता भाजप आणि शिवसेनेत अडीच-अडीच वर्षे मुख्यमंत्रिपद घेण्याचा फॉर्म्युला तयार करण्यात आला असून, त्याला तीनही पक्षांनी मान्यता दिली आहे. अमित शाह यांच्यासोबतच्या बैठकीत उशिरा त्यावर शिक्कामोर्तब होणार आहे.
राष्ट्रीय स्वयंसेवक संघ आणि भाजपने राज्यात सरकार चालवण्याचा फॉर्म्युला ठरवला आहे. पहिली अडीच वर्षे फडणवीस मुख्यमंत्री, तर पुढील अडीच वर्षे शिंदे मुख्यमंत्री असतील. मुख्यमंत्रिपद सोडल्यानंतर फडणवीस यांना भाजपचे राष्ट्रीय अध्यक्ष केले जाणार आहे. सूत्रानुसार, भाजप आणि राष्ट्रीय स्वयंसेवक संघाने मिळून फडणवीस यांची भूमिका निश्चित केली आहे. त्यांना अडीच वर्षांसाठी मुख्यमंत्री करण्यासाठी भाजप आणि शिवसेनेमध्ये करार झाला आहे. त्याचवेळी फडणवीस यांना भाजपचे राष्ट्रीय अध्यक्ष करण्यासाठी पक्षश्रेष्ठी आणि राष्ट्रीय स्वयंसेवक संघाची तयारी सुरू झाली आहे.
राष्ट्रीय स्वयंसेवक संघाचे सरसंघचालक मोहन भागवत आणि पंतप्रधान नरेंद्र मोदी यांनी देवेंद्र फडणवीस यांना मुख्यमंत्री करण्यासाठी सहमती दर्शवल्याचे सूत्रांचे म्हणणे आहे. याचे मुख्य कारण म्हणजे फडणवीस यांचा दोन्ही संघटनांमधील समान समन्वय हे आहे. नागपूर दक्षिण-पश्चिम मतदारसंघातून फडणवीस विजयी झाले आहेत. या जागेवरून त्यांचा हा सलग चौथा विजय आहे. फडणवीस यांनी काँग्रेसचे प्रफुल्ल गुडधे यांचा पराभव केला आहे. २०१४ मध्येही दोघे आमनेसामने आले होते. त्या वेळी फडणवीस ५८,९४२ मतांनी विजयी झाले होते. २०१९ मध्ये काँग्रेसने उमेदवार बदलून आशिष देशमुख यांना तिकीट दिले. त्यानंतर देवेंद्र फडणवीस ४९,३४४ मतांनी विजयी झाले. सूत्रांनी दिलेल्या माहितीनुसार, सोमवारी भाजपच्या सर्वोच्च नेतृत्वाने फडणवीस यांच्या नावाला मंजुरी दिली आहे. शिंदे यांच्या नेतृत्वाखालील शिवसेना आणि पवार यांच्या राष्ट्रवादी काँग्रेसनेही या प्रस्तावाला मंजुरी दिली आहे. फडणवीस यांच्या नावाला मुख्यमंत्रिपदासाठी मंजुरी मिळाल्याचे भाजपच्या एका सूत्राने सांगितले. महायुतीतील अन्य सूत्रांनी सांगितले, की फडणवीस मुख्यमंत्रिपदी आणि शिवसेना आणि राष्ट्रवादी काँग्रेस या दोन्ही पक्षांकडे प्रत्येकी एक उपमुख्यमंत्रिपद असेल. पवार यांच्यासह शिंदे यांना उपमुख्यमंत्री केले जाण्याची शक्यता आहे. गेल्या ३६ तासांपासून शिंदे यांची भाजपशी चर्चा सुरू होती.
शिवसेनेला जवळपास १२ मंत्रिपदे मिळू शकतात आणि काही महत्त्वाची खाती दिली जाऊ शकतात. राष्ट्रवादी काँग्रेसलाही सुमारे दहा मंत्रिपदे मिळणार असल्याचे बोलले जात आहे. महाराष्ट्रातील मंत्री परिषदेची संख्याबळ मर्यादा ४३ आहे, त्यात मुख्यमंत्र्यांचाही समावेश आहे. १३२ आमदारांसह भाजपकडे २१ मंत्रिपदे जाण्याची शक्यता आहे. सूत्रांनी दिलेल्या माहितीनुसार, गृह, वित्त, नगरविकास आणि महसूल ही प्रमुख चार खाती आता भाजपऐवजी युतीतील मित्रपक्षांना दिली जाणार आहेत. मंत्रिपदे आणि खात्यांच्या संख्येवरून वाटाघाटी सुरू आहेत.
केंद्रीय गृहमंत्री अमित शाह दिल्लीत शिंदे, फडणवीस आणि पवार यांच्यासोबत बैठक घेणार आहेत. त्यानंतर घोषणा अपेक्षित आहे. भाजपच्या केंद्रीय नेतृत्वाने पक्षाचे हित अबाधित ठेवत त्यांच्या समस्यांची काळजी घेण्याचे आश्वासन मित्रपक्षांना दिल्याचे मानले जात आहे. यापूर्वी २०१४ मध्ये देवेंद्र फडणवीस मुख्यमंत्री झाले आणि त्यांनी त्यांचा पाच वर्षांचा कार्यकाळही पूर्ण केला. त्या वेळी भाजपची तत्कालीन अविभाजित शिवसेनेशी युती होती. २०१९ च्या विधानसभा निवडणुकीनंतर फडणवीस यांच्या नेतृत्वाखालील भाजपने अजित पवार यांच्याशी हातमिळवणी केली. फडणवीस यांनी मुख्यमंत्री आणि पवार यांनी उपमुख्यमंत्री म्हणून शपथ घेतली; परंतु हे सरकार केवळ ८० तास टिकले.
सर्वाधिक आमदार फडणवीस यांच्या पाठीशी
भाजपच्या पाठिंब्यामुळे चार सहयोगी पक्षांतील आमदार निवडून आले. विधानसभेतील नवनिर्वाचित पाच आमदारांचा भाजपला पाठिंबा आहे. राष्ट्रीय समाज पक्षाचे आमदार रत्नाकर गुट्टे, जनसुराज्य पक्षाचे आमदार विनय कोरे आणि अशोक माने, युवा स्वाभिमान पक्षाचे आमदार रवी राणा आणि अपक्ष आमदार शिवाजी पाटील यांचा भाजपला पाठिंबा आहे. ५ आमदारांच्या पाठिंब्यामुळे भाजपची संख्या १३७ वर पोहोचली आहे. महायुतीतील सर्वाधिक आमदारांची मुख्यमंत्री म्हणून फडणवीसांना पसंती देण्यात आली आहे. भाजपने आपल्या कोट्यातून चार जागा मित्रपक्षांना सोडल्या होत्या, त्यापैकी तीन जागांवर विजय झाला असून, तिन्ही आमदारांनी भाजपला पाठिंबा दिला आहे.
मुंबईः देवेंद्र फडणवीस मुख्यमंत्री होणार असल्याची चर्चा सुरू झाली आहे. मराठा आरक्षणाचे नेते मनोज जरांगे पाटील यांनी थेट फडणवीस यांच्यावर हल्ला केला आहे. तुम्ही पुन्हा मुख्यमंत्री झाला, की मी पुन्हा उपोषणाला बसलोच समजा. तुम्ही पुन्हा या, मी पुन्हा उपोषणास बसतो. काय व्हायचे ते बघू या. आपल्यापाशी सुट्टी नाही, असा इशारा त्यांनी दिला. जरांगे पाटील म्हणाले, की यापूर्वीही तेच होते. दुसरे कोणी नव्हते. मराठे सगळ्यांशी खेटले आहेत. मराठ्यांपुढे कोणीही सत्ताधारी नाही. मी मराठ्यांची पोर मोठे करण्याचा ध्यास घेतला आहे. आरक्षण देण्याचे वचन समाजाला दिले आहे. पडणारे पडले, निवडून येणारे आले. आपण त्यांचे संसार मोठे केले. आम्ही पडलेला आणि निवडून आलेला दोघांनाही मतदान केलेले आहे. आता या दोघांनी मराठ्यांच्या गोरगरीब पोरांच्या आंदोलनात सहभागी व्हायचे.
राज्यात कोणाचेही सरकार आले, तरी मराठ्यांना काही टेन्शन नाही. कारण कोणीही आले तरी आम्हाला लढावेच लागणार आहे. मागच्या सरकारमध्ये तेच होते. या सरकारमध्ये तेच आहेत. त्यामुळे आम्हाला त्यांचे काही सोयरसुतक नाही. आता देशात झाले नाही, असे सामूहिक उपोषण आपण करणार आहोत. आता मराठ्यांचा नाद करायचा नाही. मराठ्यांच्या मनगटात बळ आहे. त्यांच्यात रग आहे. त्यांना तोडीस तोड उत्तर दिले जाईल. तुम्ही आहेतच किती? तुम्हाला महाराष्ट्रात फिरू देणार नाही, असा थेट इशारा जरांगे पाटील यांनी दिला आहे.
महायुती आणि महाविकास आघाडी दोन्ही आपल्याकडून बोलत नाहीत. यामुळे मराठ्यांना लढावेच लागणार आहे. हे दोन्ही बोलत नाहीत, म्हणूनच आम्हाला उमेदवार उभे करून त्यांचा सुपडा साफ करायचा होता; परंतु आमचे समीकरण जुळले नाही. तसेच निवडणूक एकाच जातीवर निवडून येणे शक्य नव्हते; परंतु माझ्या मराठ्याशिवाय राज्यात कोणाची सत्ता येऊ शकत नाही. मराठे गप्प आहेत. शांत आणि संयमी आहेत; परंतु त्यांच्यात भयंकर आग धुमसते आहे. ताकदसुद्धा आहे. मराठ्यांना खेटण्याचा प्रयत्न करू नका, अन्यथा परिणाम भोगावे लागतील, असा इशारा त्यांनी दिला.
मुंबईः मुंबईतील पत्रकारावर झालेल्या सामूहिक बलात्कार प्रकरणाची सोमवारी सर्वोच्च न्यायालयात सुनावणी झाली. या वेळी न्यायालयाने आरोपीच्या वकिलाला चांगलेच फटकारले. न्यायालयाने म्हटले आहे, की एका अल्पवयीन मुलीवर पाच जणांनी सामूहिक बलात्कार केला आणि तुम्ही पीडितेशी आरोपीचे अधिकार संतुलित करण्याची मागणी करत आहात, तुम्ही हे कसे करू शकता? या खटल्याची सुनावणी न्यायमूर्ती सतीश चंद्र शर्मा आणि न्यायमूर्ती बेला एम. त्रिवेदी करत होते.
सुनावणीदरम्यान न्या. शर्मा म्हणाले, की यापेक्षा क्रूर केस मी पाहिलेली नाही. न्या. त्रिवेदी म्हणाल्या, की हे ओपन अँड शट केस आहे. सर्व साक्षीदार तुमच्या विरोधात आहेत, हा उच्च न्यायालयाचा सविस्तर निर्णय आहे. मुंबई उच्च न्यायालयाच्या निर्णयाविरोधात आरोपींनी केलेल्या अपिलावर सर्वोच्च न्यायालयाने ही टिप्पणी केली. या प्रकरणाची सुनावणी मंगळवार, २६ नोव्हेंबरपर्यंत पुढे ढकलण्यात आली आहे. २०१३ मध्ये मुंबईत २३ वर्षीय महिला फोटो जर्नालिस्टवर पाच जणांनी सामूहिक बलात्कार केला. महिला पत्रकार संध्याकाळी फोटो काढण्यासाठी तिच्या मित्रासोबत लोअर परळ येथील शक्ती मिल परिसरात गेली होती. त्यादरम्यान आरोपींनी पीडितेच्या मित्राला बंधक बनवून बेल्टने बांधले. त्यानंतर महिलेवर पाच जणांनी सामूहिक बलात्कार केला. या आरोपींपैकी एक किशोरवयीन होता.
सामूहिक बलात्कारानंतर पीडित महिलेची प्रकृती अत्यंत वाईट झाली होती. त्यानंतर तिला रुग्णालयात दाखल करण्यात आले. या प्रकरणाची माहिती मिळताच पोलिसांनी सर्व आरोपींना अटक केली. त्यांना पकडण्यासाठी सुमारे २० पथके तैनात करण्यात आली होती. सर्व आरोपींनी आपल्या गुन्ह्याची कबुली दिली होती. त्या वेळी या प्रकरणावरून बराच गदारोळ झाला होता. या घटनेमुळे संतप्त झालेल्या शिवसेना आणि मनसे कार्यकर्त्यांनी मुंबईतील एन. एम.जोशी पोलिस ठाण्याबाहेर निदर्शने केली, तर मुंबईतील पत्रकार संघटनेनेही मोर्चा काढला होता.
मुंबईः विधानसभेच्या निवडणुकीमध्ये महाराष्ट्र नवनिर्माण सेनेच्या हाती एकही जागा लागली नाही. मनसेच्या स्थापनेपासून पहिल्यांदाच असे घडले आहे. मनसेचा एकही आमदार विधानसभेमध्ये नसेल. मनसेप्रमुख राज ठाकरे यांनी आज पराभूत आमदारांबरोबर पराभवाच्या कारणांची माहिती घेण्यासाठी, चर्चा करण्यासाठी बैठक बोलावली होती. या बैठकीमध्ये भारतीय जनता पक्षाबरोबरची जवळीक घातक ठरल्याचे मत पराभूत उमेदवारांनी नोंदवले.
आज राज यांनी मुंबईमधील निवासस्थानी बोलावलेल्या बैठकीमध्ये पराभूत उमेदवारांचे म्हणणे ऐकून घेतले. या बैठकीमध्ये ‘ईव्हीएम’संदर्भातील काही तक्रारी पराभूत उमेदवारांनी राज यांच्याकडे केल्या. भाजपबरोबरची जवळीक आपल्याला फायद्याची ठरली नाही, असे पराभूत उमेदवारांनी राज यांना सांगितले आहे. राज यांनी मुंबई आणि उपनगरांमधून एकूण ४२ उमेदवार उभे केले होते; मात्र एकही उमेदवार जिंकून आला नाही. इतकेच काय तर स्वत: राज यांचे पुत्र अमित ठाकरे हेसुद्धा दादर-माहीम मतदारसंघातून तिसऱ्या स्थानी राहत पराभूत झाले. पक्षाचा एकही आमदार निवडून आलेला नाही.
या पार्श्वभूमीवर राज यांनी आज महत्त्वाची बैठक बोलावली होती. या बैठकीला मुंबई आणि परिसरातील पराभूत उमेदवारांना बोलावले होते. नेमका पराभव कशामुळे झाला याची चाचपणी त्यांनी या बैठकीमध्ये केली. मनसेच्या सभांना चांगला प्रतिसाद मिळत होता. सभांना गर्दी होत होती, मग त्याचे रूपांतर मतांमध्ये का झाले नाही? यावर या बैठकीत चर्चा झाली. किमान चार ते पाच जण निवडून येतील, अशी अपेक्षा मनसेला होती; मात्र १३८ उमेदवार उभे करून एकही उमेदवार निवडून आला नाही. या वेळी बैठकीमधील पराभूत उमेदवारांकडून ‘ईव्हीएम’वर शंका उपस्थित करण्यात आली.
लोकसभा निवडणुकीला भाजपशी जवळीक करत बिनशर्त पाठिंबा दिला होता; मात्र विधानसभेला भाजपशी जवळीक करणे फायद्याचे ठरले नाही, असे पराभूत उमेदवारांनी सांगितले. या सगळ्या गोष्टींची नाराजी उमेदवारांनी व्यक्त केली आहे. या बैठकीमध्ये राज यांनी कोणतेही मार्गदर्शन केले नाही. त्यांनी केवळ पराभूत उमेदवारांना काय वाटते, हे जाणून घेतसे. आता राज यानंतर काय बोलणार, प्रसारमाध्यमांशी संवाद साधणार का, हे अजून गुलदस्त्यातच आहे.
मुंबई : विशेष प्रतिनिधी : आदर्श आचारसंहिता लागू असताना वादग्रस्त आयपीएस अधिकारी रश्मी यांनी उपमुख्यमंत्री देवेंद्र फडणवीस यांची भेट घेऊन आचारसंहितेचा भंग केला आहे. निवडणूक आयोगाने याची गंभीर दखल घेऊन त्यांच्यावर तत्काळ कारवाई करावी, अशी मागणी प्रदेश काँग्रेसचे मुख्य प्रवक्ते अतुल लोंढे यांनी केली आहे.
निवडणूक काळात काँग्रेसने वारंवार केलेल्या मागणीमुळे केंद्रीय निवडणूक आयोगाने शुक्ला यांना पोलीस महासंचालक पदावरून हटवले होते. सरकारने त्यांना निवडणूक काळापूर्वीपुरता सक्तीच्या रजेवर पाठवले. विधानसभेत महायुतीला प्रचंड बहुमत मिळाल्याने त्यांचे सरकार पुन्हा स्थापन होणार आहे. या पार्श्वभूमीवर शुक्ला यांनी रविवारी उपमुख्यमंत्री देवेंद्र फडणवीस यांच्या सागर बंगल्यावर जाऊन त्यांची भेट घेत यशाबद्दल त्यांचे अभिनंदन केले होते.
याबाबत लोंढे म्हणाले की, तेलंगणामध्ये अशाच प्रकारे पोलीस महासंचालक आणि एका वरिष्ठ अधिकाऱ्याने वरिष्ठ मंत्र्याची भेट घेतली असता निवडणूक आयोगाने त्यांच्यावर तत्काळ कारवाई केली होती. गैरभाजपा राज्यात निवडणूक आयोग तत्काळ कारवाई करतो पण भाजपाशासित राज्यात निवडणूक आयोगाला काही दिसतच नाही का?. शुक्ला यांच्यावर विरोधी पक्षांच्या नेत्यांचे फोन टॅपिंग करण्यासारखे गंभीर गुन्हे आहेत. काँग्रेसच्या मागणीमुळे त्यांना पदावरून हटवण्यात आले आहे. विधानसभेचा निकाल लागला असला तरी आचारसंहिता संपण्याआधीच गृहमंत्र्यांना भेटून शुक्ला यांनी आदर्श आचारसंहितेचे उल्लंघन केलेले आहे, त्यांच्यावर तातडीने कारावाई झाली पाहिजे, याचा पुनरूच्चार लोंढे यांनी केला.
महाराष्ट्र दिनमान ऑनलाईन डेस्क : महाराष्ट्र विधानसभा निवडणुकीतील २८८ मतदारसंघांचे निकाल शनिवारी जाहीर झाले. या निवडणुकीत महायुतीला सर्वाधिक,२३० जागा मिळाल्या. विरोधी महाविकास आघाडीला ५० जागांचा आकडाही पार करता आला नाही. ‘मविआ’ची पुरती धूळदाण उडाली. जाणून घ्या पक्षनिहाय नवनियुक्त आमदारांची नावे…
महाराष्ट्र दिनमान ऑनलाईन डेस्क : लोकसभेतील पराभव विसरत महाराष्ट्र विधानसभा निवडणूकीत महायुतीने मोठा कमबॅक केला आहे. या विजयाचे श्रेय मुख्यमंत्री एकनाथ शिंदे यांनी लाडक्या बहिणींना दिले आहे. यावेळी बोलताना ते म्हणाले की, मी माझ्या लाडक्या बहिणींचे मनापासून अभिनंदन करतो. राज्यात महायुती सरकारने केलेल्या कामांची पोचपावती मिळाली आहे. या दणदणीत विजयामुळे आमची जबाबदारी वाढली आहे. राज्यातील जनतेला त्रिवार वंदन करतो. महायुतीच्या कार्यकर्त्यांचे अभिनंदन करतो. (Eknath Shinde)
एकनाथ शिंदे यांनी नेत्यांसह मिठाई वाटप करून आनंद साजरा केला. पुढे बोलताने एकनाथ शिंदे म्हणाले की, राज्यात मुख्यमंत्री कोण होणार हे अजून ठरलेले नाही. निवडणुकीचा स्पष्ट निकाल येवू द्या. जसे आम्ही एकत्र निवडणुकीला सामोरे गेलो. तसेच महायुती म्हणून एकत्र बसून मुख्यमंत्री पदाचा निर्णय घेवू असे एकनाथ शिंदे म्हणाले.
निवडणूक आयोगाने जाहीर केलेल्या आकडेवारीनुसार महायुतीने राज्यातील २८८ पैकी २१७ जागांवर आघाडी घेतली आहे. तर महाविकास आघाडीने ५१ जागांवर आघाडी घेतली आहे. तर इतरांनी २० जागांवर आघाडी घेतली आहे. दरम्यान निकाल स्पष्ट होताच महायुतीने सत्ता स्थापन करण्याची तयारी केली आहे.
