मुंबई : प्रतिनिधी
आगामी विधानसभा निवडणुकीच्या प्रचारादरम्यान गुन्हेगारी पार्श्वभूमीच्या उमेदवारांना टीव्हीवरही जाहिरात बंधनकारक असल्याचे देशाचे मुख्य निवडणूक आयुक्त राजीवकुमार यांनी शनिवारी स्पष्ट केले. तसेच निवडणुका एका टप्प्यात होणार की दोन टप्प्यात होणार हे आम्ही योग्य वेळी जाहीर करू, असेही त्यांनी स्पष्ट केले.
पत्रकार परिषदेत ते म्हणाले, ‘‘ज्या उमेदवारांवर तीन गुन्हे दाखल असतील त्या उमेदवारांना प्रिंट मीडिया आणि इलेक्ट्रॉनिक मीडियामध्ये जाहिरात प्रसिद्ध करावी लागेल. त्याबाबत डिक्लरेशन द्यावे लागेल. याशिवाय संबंधित राजकीय पक्षांनाही अशा गुन्हेगारी पार्श्वभूमी असलेल्या उमेदवाराला तिकीट का दिले, याबाबतची जाहिरात द्यावी लागेल. तब्बल तीन दिवस प्रिंट आणि इलेक्ट्रॉनिक मीडियामध्ये अशी जाहिरात प्रसिद्ध करावी लागेल. अन्यथा संबंधित उमेदवारावर कारवाई करण्यात येईल.’’
दरम्यान, राज्यातील विधानसभा निवडणुका दिवाळीनंतरच घेण्यात येणार असल्याचे संकेत त्यांनी दिले. निवडणूक कार्यक्रम जाहीर करताना दसरा, दिवाळी आणि सुट्ट्यांचा अंदाज घ्यावा, अशा सूचना राजकीय पक्षांनी केल्या आहेत. त्यांचा विचार करण्यात येईल, असे ते म्हणाले.
कोल्हापूर : प्रतिनिधी
करवीर निवासिनी श्री अंबाबाईच्या शारदीय नवरात्रोत्सवाची तयारी अंतिम टप्प्यात आली आहे. मंदिरातील गाभाऱ्याची स्वच्छता शनिवारी पूर्ण झाली. त्यानंतर संध्याकाळपासून नियमीत दर्शन सुरू झाले. येत्या दोन ते तीन दिवसांत मंदिर परिसरातील स्वच्छतेचे काम पूर्ण होईल. मंदिराच्या आवारात गरुड मंडपाची प्रतिकृती उभारण्याचे काम सुरू झाले आहे.
मंदिरातील चांदीच्या पालखीची स्वच्छता करण्यात आली. देवीच्या खजिन्यातील सोन्या-चांदीच्या दागिन्यांची स्वच्छता सुरू आहे. ते काम रविवारी, २८ सप्टेबरला पूर्ण होणार आहे. मंदिराच्या पूर्वेला दर्शनरांग उभारण्यात आली आहे. ऊन आणि पावसाची लक्षात घेऊन या ठिकाणी पंखे, इलेक्ट्रिक सुविधा आणि मॅट टाकण्यात येणार आहे. माहिती कक्ष, लाडू प्रसाद सुविधा देण्याच्या दृष्टीने नियोजन करण्यात येत आहे. उत्सवकाळातील भाविकांची गर्दी लक्षात घेऊन तातडीने गरुड मंडपाच्या जागी छत उभारण्यात आले आहे. त्याचे उर्वरित काम एक-दोन दिवसांत पूर्ण होईल.
टेंबलाई मंदिर परिसरात सीसीटीव्ही यंत्रणा
दरम्यान, टेंबलाई मंदिर परिसरात सुरक्षेच्यादृष्टीने सीसीटीव्ही यंत्रणा उभारणीचे काम सुरू करण्यात आले आहे. पश्चिम महाराष्ट्र देवस्थान समितीच्यावतीने हे काम सुरू आहे. नवरात्रोत्सवात ललित पंचमीचा उत्सव टेंबलाई मंदिरात होतो. त्यादृष्टीने या यंत्रणेचा उपयोग पोलिस प्रशासन व देवस्थान समितीला होणार आहे.
सांगली : प्रतिनिधी
एकेकाळी सांगली जिल्ह्याच्या राजकारणात दुष्काळी प्रश्न सोडवण्यासाठी स्थापन झालेल्या जिल्ह्यातील नेत्यांनी राजकीय सुकाळ आणला. त्यांच नेत्यांनी आता पुन्हा आगामी विधानसभा निवडणुकीच्या पार्श्वभूमीवर पुन्हा एकदा गाठीभेटी वाढवल्या आहेत. भाजपवर नाराज असलेल्या नेत्यांनी आगामी विधानसभा निवडणुकीत दबावगट निर्माण करण्याचा निर्णय घेतला आहे. (Maharashtra Politics)
विधानसभा निवडणुकीतही ताकद दाखवण्याचा इशारा
नुकत्याच झालेल्या लोकसभा निवडणुकीत भाजपच्या पराभवास कारणीभूत ठरलेल्या दुष्काळी फोरममधील नेत्यांनी आता विधानसभा निवडणुकीतही ताकद दाखवण्याचा इशारा दिला आहे. यासाठी फोरममधील काही नेत्यांची बैठक झाली. यावेळी विलासराव जगताप, भाजपचे माजी जिल्हाध्यक्ष पृथ्वीराज देशमुख, माजी मंत्री अजितराव घोरपडे उपस्थित होते. जिल्ह्यातील विविध पक्षांतील नेत्यांनी दुष्काळी फोरम नावाने एक स्वतंत्र गट स्थापन केला आहे. पूर्वी या गटाला उपमुख्यमंत्री अजित पवार यांची ताकद मिळाली होती. मात्र, या गटातील जवळपास सर्वच नेते गेल्या काही वर्षांत भाजप, शिवसेनेत गेले. त्यानंतर हा फोरम शांत होता. मात्र, नुकत्याच झालेल्या लोकसभा निवडणुकीत या फोरमने आपली ताकद दाखविली.
भाजपमध्ये असलेले या फोरमधील नेते पक्षाबद्दल काही दिवसांपासून नाराज आहेत. त्यांची नाराजी तत्कालीन खासदार संजय पाटील यांच्या कार्यपद्धतीवर होती. पृथ्वीराज देशमुख आणि जगताप यांनी पक्षाकडे अनेक तक्रारी केल्या. पक्षाच्या बैठकीत जाहीरपणे ही नाराजी बोलून दाखवली; पण या नेत्यांच्या नाराजीची दखल भाजपने घेतली नाही. त्यांचा विरोध डावलून संजय पाटील यांना उमेदवारी दिली गेली. त्यानंतर या नेत्यांनी उघडपणे पक्षाविरोधात जाऊन अपक्ष उमेदवाराचा प्रचार केला. परिणामी, लोकसभा निवडणुकीत भाजप उमेदवाराचा पराभव झाला. विरोधात काम करूनही भाजपने दुष्काळी फोरममधील या नेत्यांवर कारवाई केली नाही. विधानसभा निवडणुकीत त्यांच्या नाराजीचा फटका बसू नये, यासाठी भाजप सावध पावले टाकत असतानाच आता या फोरममधील विलासराव जगताप, पृथ्वीराज देशमुख व अजितराव घोरपडे यांची बैठक पार पडली. आता विधानसभा निवडणुकीतही तीच भूमिका कायम ठेवण्यावर या बैठकीत नेत्यांची चर्चा झाली. (Maharashtra Politics)
Maharashtra Politics : काय आहे दुष्काळी फोरम
सांगली जिल्ह्यात दुष्काळी प्रश्नांचा पाठपुरावा करण्याच्या निमित्ताने हा फोरम स्थापन झाला. यामध्ये माजी खासदार संजय पाटील, माजी आ. विलासराव जगताप, दिवंगत अनिल बाबर, माजी आमदार पृथ्वीराज देशमुख, माजी मंत्री अजितराव घोरपडे, राजेंद्रअण्णा देशमुख यांचा समावेश आहे. दुष्काळी प्रश्नांचा पाठपुरावा सुरू असतानाच राजकीयदृष्ट्या हा फोरम अधिक प्रभावशाली बनत गेला. आता यातील नेते वेगवेगळ्या पक्षात गेले असले तरी आजही या गटाचे राजकीय महत्व वेळोवेळी अधोरेखित झाले आहे.
हेही वाचा
महाराष्ट्र दिनमान ऑनलाईन डेस्क : मूळ भारतीय अंतराळवीर सुनीता विल्यम्स आणि बुच विल्मोर यांना पृथ्वीवर सुखरूप आणण्यासाठी ‘नासा’ची (NASA-National Aeronautics and Space Administration ) स्पेसएक्स क्रू-९ मोहीम आज (दि.२८) सज्ज झाली आहे. या मोहिमेच्या माध्यमातून २६ सप्टेंबर रोजी दोन अंतराळवीर जाणार होते. तथापि, हेलन चक्रीवादळामुळे मोहिमेला विलंब झाला. जाणून घेऊया या मोहिमेबद्दल.
निक हेग करणार मोहिमेचे नेतृत्व
अंतराळवीर सुनीता विल्यम्स आणि बुच विल्मोर यांनी ५ जून रोजी बोईंग कंपनीच्या स्टारलाइनर अंतराळ यानातून तिसऱ्यांदा अंतराळात यशस्वी उड्डाण केले. ही मोहीम एका आठवड्यासाठी होती. मात्र तांत्रिक बिघाडामुळे हे दोघेही तीन महिन्यांहून अधिक काळ आंतरराष्ट्रीय अंतराळ स्थानकात (ISS) आहेत. बोईंग स्टारलाइनरमधील बिघाडामुळे या दोघांचे पृथ्वीवर परतणे फेब्रुवारी २०२५ पर्यंत लांबले आहे.
आता या दोघा अंतराळवीरांना परत आणण्यासाठी एलॉन मस्कच्या स्पेस एक्सची क्रू-९ मोहीम आज (दि.२८) सुरू होणार आहे. हवामानाचा अंदाज घेऊन भारतीय प्रमाणवेळेनुसार हे यान रात्री १०.४७ झेपावणार आहे. फ्लोरिडा येथील केप कॅनवेरल स्पेस फोर्स स्टेशन येथून हे यान झेपावेल. ‘नासा’चे अंतराळवीर निक हेग या मोहिमेचे नेतृत्व करतील. रोसकॉसमॉस कॉस्मोनॉट अलेक्झांडर गोर्बुनोव्ह मिशन तज्ज्ञ म्हणून काम पाहतील.
Sunita williams : कुठे पाहता येईल मोहीम?
या मोहिमेचे थेट कव्हरेज ‘नासा’ची अधिकृत वेबसाईट आणि यू ट्यूबवर ईस्टर्न डेलाइट वेळेनुसार सकाळी ९.१० वाजता पाहता येणार आहे.
काय आहे मोहिमेचे वैशिष्ट्य?
‘नासा’ने दिलेल्या माहितीनुसार, क्रू-९ ही पॅडवरून प्रक्षेपित होणारी पहिली मानवयुक्त अंतराळ उड्डाण मोहीम असेल. क्रू-९ फ्लाइटमध्ये चार क्रू मेंबर सहभागी होणार होते. अंतराळवीर झेना कार्डमन आणि स्टेफनी विल्सन यांचाही यात समावेश होता. मात्र परत येताना यानात सुनीता विल्यम्स आणि विल्मोर यांना जागा रहावी, यासाठी झेना आणि स्टेफनी यात सहभाग होणार नाहीत.
हेही वाचा
नवरात्रोत्सवाच्या काळात घराच्या स्वच्छतेला विशेष महत्त्व असते. घर स्वच्छ ठेवल्याने नकारात्मक ऊर्जा दूर होऊन घरात सकारात्मक ऊर्जा येते असे मानले जाते. त्यामुळे घरातील अंथरुण-पांघरूणे धुण्यासाठी सगळीकडे नदीवर झुंबड उडालेली असते. सांगली जिल्ह्यातील भिलवडी (ता. पलूस) येथील कृष्णानदीच्या घाटावर धुण्यासाठी भिलवडी व आसपासच्या १२ वाड्या आणि गावातील लोक येत असतात. वाळत घातलेल्या रंगीबेरंगी अंथरूण- पांघरुणांमुळे घाटाचे सौंदर्य खुलले आहे. (छायाचित्र: अशोक जाधव, चिंचोली)
कोल्हापूर : प्रतिनिधी
कोल्हापूर जिल्हा नियोजन मंडळावर विशेष निमंत्रित म्हणून नामनिर्देशित केलेले कागल येथील छत्रपती शाहू सहकारी साखर कारखान्याचे संचालक समरजितसिंह घाटगे आणि गारगोटीचे राहुल देसाई यांचे सदस्यत्व रद्द करण्यात आले आहे. याबाबतचा शासन निर्णय नुकताच घेण्यात आला आहे. याबाबतचे परिपत्रक नियोजन विभागातर्फे जारी करण्यात आले आहे. या दोघांऐवजी डॉ. सुभाष जाधव ( शिरगांव, ता. राधानगरी ) आणि ॲड. हेमंत कोलेकर ( नेसरी, ता. गडहिंग्लज) यांची निवड करण्यात आली आहे. समरजितसिंह घाटगे यांच्याकडे यापूर्वी भाजपच्या जिल्हाक्षपदाची धुरा होती. राज्याच्या राजकारणात भाजपने गतवर्षी राष्ट्रवादी अजित पवार गटाशी हातमिळवणी केली. बदललेल्या समीकरणात आमदार हसन मुश्रीफ उपमुख्यमंत्री अजित पवार गटासोबत राहिले. त्यामुळे मुश्रीफ यांच्याकडे वैद्यकीय शिक्षण खात्याच्या मंत्रिपदासह कोल्हापूरच्या पालकमंत्री पदाची जबाबदारी आली. तेव्हापासून घाटगे नाराज होते. त्यानंतर विधानसभा निवडणूक लढविण्याचे घाटगे यांनी जाहीर केले. त्यानुसार त्यांनी राष्ट्रवादी शरद पवार गटात जाहीर प्रवेश केला. कागलमध्ये राष्ट्रवादीचे अध्यक्ष खा. शरद पवार यांची जाहीर सभा घेत ना. मुश्रीफ यांच्या विरोधात विधानसभेसाठी रणशिंग फुंकले. माजी आमदार बजरंग देसाई यांचे पुत्र व जिल्हा परिषदेचे माजी सदस्य राहुल देसाई यांच्याकडेही भाजप ग्रामीण जिल्हाध्यक्षपदाची जबाबदारी होती. त्यांनीही कांही दिवसांपूर्वी आपल्या पदाचा राजीनामा दिला आहे. ही निवड रद्द होण्यामागे या दोन्ही नेत्यांनी भाजपशी घेतलेली फारकत असल्याचे बोलले जात आहे.
दोघेही भाजपचे पदाधिकारी
जिल्हा नियोजन समितीवर निवड झालेले नूतन निमंत्रीत सदस्य हे भाजपचे पदाधिकारी आहेत. डॉ. जाधव हे भाजपाचे जिल्हा सरचिटणीस म्हणून काम पाहतात. तसेच ॲड. कोलेकर हे जिल्हा परिषदेचे माजी सदस्य आहेत.
सांगली, प्रतिनिधी
कवठेमहांकाळ येथील राष्ट्रवादी शरदचंद्र पवार पक्षाचे नेते व माजी उपनगराध्यक्ष अय्याज मुल्ला यांना भाजपचे माजी खासदार संजयकाका पाटील यांच्या समर्थकांनी शुक्रवारी सकाळी घरात घुसून बेदम मारहाण केली. संजयकाका यांनीही आपल्याला मारहाण केल्याचा आरोप मुल्ला यांनी केला आहे. आमदार सुमन पाटील आणि युवा नेते रोहित पाटील यांनी पोलीस ठाण्यासमोर आंदोलन केल्यानंतर पोलिसांनी यासंदर्भातील तक्रार दाखल करून घेतली.
घटना सकाळी साडेसात वाजण्याच्या सुमारास घडली. अय्याज मुल्ला हे फेरफटका मारून घरासमोर बसले असताना संजयकाका पाटील यांचे पीए खंडू होवळे हे मुल्ला यांच्या घरी आले. आपणास संजयकाका भेटायला येणार असल्याचा निरोप त्यांनी दिल्यावर मुल्ला यांनी त्यांच्यासाठी घरी चहा बनवायला सांगितले. तोपर्यंत दारात दोन-तीन गाडी येऊन थांबल्या. गाड्यांमधून माजी खासदार संजयकाका पाटील यांच्यासह दहा-पंधरा जण उतरले. मुल्ला यांच्या म्हणण्यानुसार त्यांनी थेट घरात घुसून अय्याज मुल्ला यांना मारहाण करायला सुरुवात केली. त्यांना वाचवायला आलेल्या त्यांच्या घरातील महिला व मुलांनाही शिवीगाळ करत जबर मारहाण केली, तसेच आपल्या ७६ वर्षांच्या आईलाही ढकलून दिल्याचा आरोप मुल्ला यांनी केला आहे.
माझे स्वीय सहायक होवाळे यांना मारहाण झाली. त्याबाबत विचारणा करण्यासाठी गेलो असता, अरेरावी व मारण्याची भाषा करू लागला. त्यांनीच माझ्या कार्यकर्त्यांना कानशिलात मारल्या. ”
– संजयकाका पाटील, माजी खासदार
राष्ट्रवादी काँग्रेस शरदचंद्र पवार पक्षातर्फे तालुक्यातील या गुंडगिरी विरुद्ध उद्या निषेध सभा बोलावण्यात आली आहे. घटना कळल्यानंतर माजी खासदार संजयकाका पाटील यांच्यावर गुन्हा दाखल करण्याच्या मागणीसाठी आमदार सुमन पाटील व रोहित पाटील यांच्यासह कार्यकर्त्यांनी पोलिस ठाण्यासमोर ठिय्या आंदोलन सुरू केले. गुन्हा दाखल होत नाही तोपर्यंत ठिया आंदोलन थांबवणार नाही असा पवित्रा त्यांनी घेतला. पोलिसांनी तक्रार दाखल करून घेतल्यानंतर आंदोलन मागे घेण्यात आले.
कोल्हापूर : प्रतिनिधी
जुनी पेन्शन योजना लागू करावी, अशैक्षणिक कामांचा बोजा कमी करावा व कंत्राटी शिक्षक नेमणुकीचा आदेश तत्काळ रद्द करावा, या प्रमुख मागण्यांसह हजारो शिक्षकांनी शुक्रवारी, दि. २७ रोजी जिल्हाधिकारी कार्यालयावर मोर्चा काढला. जिल्हयातील शैक्षणिक संघटनांनी शाळा बंद ठेवून यात सहभाग घेतला.
कोल्हापूर जिल्हा शैक्षणिक व्यासपीठ व मुख्याध्यापक संघ, शिक्षण संस्था चालक संघ, प्राथमिक, माध्यमिक व उच्च माध्यमिक शिक्षक संघटना यांच्या संयुक्त विद्यमाने हा महामोर्चा काढण्यात आला. निवासी उपजिल्हाधिकारी संजय तेली यांना निवेदन देण्यात आले.
शिक्षणाचे कंत्राटीकरण रद्द करा, अशैक्षणिक कामे रद्द करा, शिक्षण आमच्या हक्काचे नाही कुणाच्या बापाचे, शिक्षण क्षेत्र उद्ध्वस्त करू नका, शिक्षणावरील बजेट वाढविलेच पाहिजे, आदी घोषणांनी मोर्चाचा मार्ग दणाणून गेला. जिल्हाधिकारी कार्यालयाजवळ आल्यानंतर मोर्चाचे रूपांतर सभेत झाले. या सभेत एस. डी. लाड, दादा लाड, अनिल लवेकर, भरत रसाळे, राजाराम वरुटे, प्रसाद पाटील, रवी पाटील, आर. वाय. पाटील, आदींची भाषणे झाली. सूत्रसंचालन उमेश देसाई यांनी केले.
या प्रसंगी चेअरमन राहुल पवार,बाळ डेळेकर, बी. जी. बोराडे, सुधाकर निर्मळे, खंडेराव जगदाळे, बाबा पाटील, प्रा. सी. एम. गायकवाड, सुधाकर सावंत, उमेश देसाई, उदय पाटील, के. के. पाटील, राजेंद्र कोरे, संतोष आयरे, गौतम वर्धन, मिलींद बारवडे आदी प्रमुख पदाधिकाऱ्यांसह शिक्षक-शिक्षकेतर कर्मचारी सहभागी झाले होते.
शिक्षकांच्या प्रमुख मागण्या
अन्यायकारक संच मान्यता शासन आदेश रद्द करावा, कंत्राटी शिक्षक नियुक्तीचा आदेश तत्काळ रद्द करावा, जुनी पेन्शन योजना सर्वांना लागू करावी. विना अनुदानित शिक्षक व शिक्षकेत्तर कर्मचाऱ्यांचे टप्पावाढ आदेश त्वरित काढावेत, आधारकार्ड आधारित शिक्षक पद निर्धारण धोरण रद्द करावे, शिक्षकांवरील अशैक्षणिक कामे कमी करावीत, प्राथमिक शाळेला अंगणवाडी जोडावीत, उपक्रमांचा भडीमार बंद करावा, पदवीधर शिक्षकांना वेतणश्रेणी लागू करा टप्पा अनुदान शाळांना पुढील अनुदानाचे टप्पे तत्काळ मिळावेत, शिक्षकांची अशैक्षणिक कामे बंद करावीत.
वारणानगर : प्रतिनिधी
जातीवंत म्हैशीच्या पैदाशीसाठी मेहसाना आणि मुऱ्हा म्हैशी वारणा दूध संघामार्फत खरेदी करण्यात येणार आहेत. तसेच संघाच्या कार्यस्थळावर विक्री केंद्रही सुरू केले जाईल. या केंद्रातून म्हैस खरेदी करणाऱ्या दूध उत्पादक शेतकऱ्यांना ४२ हजार रुपयांचे अनुदान देण्यात येणार असल्याची घोषणा संघाचे अध्यक्ष आमदार विनय कोरे यांनी केली. देशातील असे पहिलेच केंद्र असल्याचे त्यांनी सांगितले. दूध संघाला ५९ कोटींचा ढोबळ नफा झाल्याचे सांगून कोरे यांनी पुढील वर्षी पशुवैद्यकीय आणि डेअरी टेक्नॉलॉजी कॉलेज सुरू होणार असल्याची माहिती दिली.
वारणा सहकारी दूध उत्पादक प्रक्रिया संघाच्या ५६ व्या वार्षिक सभेत डॉ. कोरे बोलत होते.
डॉ. कोरे म्हणाले, म्हैस आणि गाय दूधात प्रचंड तफावत आहेत. म्हैशीच्या दुधाचीच उत्पादने बनवली जातात. त्यामुळे वारणानगर येथील केंद्रावर सुमारे ४०० ते ५०० म्हैशींचा गोठा तयार करण्यात येणार आहे. परराज्यातूंन मेहसाना आणि मुऱ्हा जातीच्या म्हैशी संघामार्फत खरेदी केली जाणार आहेत. त्यामुळे दूध उत्पादक शेतकऱ्यांना म्हैशी खरेदी करण्यासाठी लागणारा वेळ, वाहतूक खर्च आणि होणारी फसवणूक टळणार आहे.
वारणा संघाचे दूध भारतीय सैन्यदलात, आदीवासी समाजातील मुलांना सुगंधी दूध पुरवठा, मेट्रो, शताब्दी, राजधानी व वंदे मातरम एक्स्प्रेस या रेल्वेमध्ये वारणाची उत्पादने विक्रीसाठी उपलब्ध केली आहेत. मुंबई महापालिकेच्या रुग्णालयात दूध पुरवठा करण्याचे टेंडरही संघाला मिळाले आहे. रिलायन्स, डी मार्ट या मॉलच्या माध्यमातून १९ कोटींची विक्री झाल्याचेही कोरे यांनी सांगितले.
कार्यकारी संचालक मोहन येडूरकर यांनी स्वागत केले. वारणा समूह विद्यापीठ मंजूर झाल्याबद्दल आमदार डॉ. कोरे यांचा सत्कार करण्यात आला. सहकारमहर्षि तात्यासाहेब कोरे यांना पद्मभूषण पुरस्कार मिळण्यासाठी महाराष्ट्र शासनाकडे प्रस्ताव पाठवावा, असा ठराव यावेळी मंजूर करण्यात आला.
कोल्हापूर : प्रतिनिधी
विधानसभा निवडणुकीसाठी शिवसेना उद्धव ठाकरे गटाने बैठका सुरू केल्या आहे. मुंबईत पक्षप्रमुख उद्धव ठाकरे यांनी शुक्रवारी पश्चिम महाराष्ट्रातील कोल्हापूर जिल्ह्यातील मतदार संघांचा आढावा घेतला. जिल्ह्यातील दहा मतदारसंघापैकी कोल्हापूर उत्तर मतदार संघ शिवसेनेने लढवावा, अशी जोरदार मागणी पदाधिकाऱ्यांनी केली. महाविकास आघाडीच्या जागा वाटपात कोल्हापूर उत्तरचा आग्रह धरला जाईल, असे आश्वासन ठाकरे यांनी दिले. कोल्हापूर उत्तरसाठी जो उमेदवार दिला जाईल त्यांच्या पाठीशी सर्व पदाधिकारी, शिवसैनिक राहतील. कोणत्याही परिस्थितीत ही जागा निवडून आणली जाईल, असा निर्धारही शिवसेना पदाधिकाऱ्यांनी व्यक्त केला.
‘मातोश्री’वर झालेल्या आढावा बैठकीला माजी खासदार विनायक राऊत, आमदार मिलिंद नार्वेकर, कोल्हापूर जिल्ह्याचे संपर्कप्रमुख अरुण दुधवडकर उपस्थित होते. ठाकरे यांनी दहाही मतदारसंघाचा आढावा घेतला. कोल्हापूर उत्तर, राधानगरी, शिरोळ, हातकणंगले, शाहूवाडी या मतदारसंघात शिवसेनेला जिंकण्याची चांगली संधी आहे. या मतदार संघाचा आग्रह धरावा, अशी मागणी पदाधिकाऱ्यांनी केली.
कोल्हापूर उत्तर विधानसभा मतदारसंघातील परिस्थिती ठाकरे यांनी जाणून घेतली. सध्या हा मतदार काँग्रेसकडे असला तरी १९९० पासून या मतदार संघात पाचवेळा शिवसेनेचा विजय झाला आहे. हा शिवसेनेचा बालेकिल्ला असल्याने या मतदार संघात पक्षाला मोठी संधी आहे. उद्धव ठाकरे या मतदारसंघात जो उमेदवार देतील त्याच्या पाठीशी ठामपणे उभे राहण्याची ग्वाहीही पदाधिकाऱ्यांनी दिली. शिष्टमंडळात शिवसेना उप नेते आणि जिल्हा प्रमुख संजय पवार, जिल्हा प्रमुख विजय देवणे, शहर प्रमुख रवीकिरण इंगवले, सुनील मोदी, उप प्रमुख दिनेश साळोखे यांच्यासह पदाधिकाऱ्यांचा समावेश होता.